تدورالأحداث في
بلد تُسمي " كولاكارتون"!
سمعك يلي بتسأل وإنت مكشر
أو بتضحك ضحكة صفرا ! نصيحة من أخ متحاولش تدور علي أي معلومة خاصة بيها مش هتلاقي !
بمعني أصح أحب أقولكم إن
كل ال المكتوب ده خيالي وغير موضوعي وغير واقعي وأي تشابه في الأحداث أو
الشخصيات لا قدر الله فهو من وحي الخيال ومش موجود أصلاً ولو موجود قشطة عادي وصدفة يعني وبتحصل في أحسن
العائلات ! بُص يعني كبر مخك :D
والكاميرا المرة دي جوه الميكروباص وكان الكدر علي الراديو وهو بيعلن عن نية
الفريق" مُنشار السلحدار" ترشحه لرئاسة "كولا كارتون"
وإنه مستمر في مُحاربة الإرهاب إيااااه ......
والناس في الميكروباص ما بين مؤيد ومعارض للقرار ده ,
بس سيادة الفريق الصراحة كان بيحب الإتنين وبيعتبر كل واحد فيهم " نور
عينيه" بس بطريقته الخاصة :)
الكاميرا مشيت في
الميكروباص عشان تشوف مشاكل المواطن الكولاكارتوني , وأول حد شافته كان مواطن في
إيده كيس وجواه 10 جنيه فقط لا غير
ومُتردد يدفع الأجرة منها ولا يقول للسواق معيش ولا يستني واحد شهم يدفع ليه .... ولما طارت ال 10 جنيه
من إيد المواطن , نظرة عينه كانت مؤلمة جداً وهي بتتأمل أخر فلوس في الكيس والسؤال
يا تري بقية الشهر هايتقضي إزاي ؟
عزيزي الفريق "
مُنشار السلحدار" عارف إنك في بلد طبقية ؟ عارف إنك سايب الغني ياكل و يكبر
كرشه وسايب الفقير لسة مش لاقي يأكل ؟ تفتكر نظرة الراجل ده للأغني منه عاملة إزاي
؟ تفتكر الفقير لما هاينفجر هايبقي الوضع
عامل إزاي ؟ لو عايز تتشرح إترشح بس إبقي
إعرف نسبة الفقر كام عشان المؤتمرات والكلام الحلو ده !
بس تفتكر يا سيادة الفريق " مُنشار السلحدار
" ده مش إرهاب مٌستقبلي متوقع ؟ !
الكاميرا بتقرر تكمل
الإستكشاف وبتجيب إتنين مواطنين بيكلموا عن مٌشكلة بس ظاهر عليهم أثر سيجارة
البانجو إل إصتبحوا بيها .
مواطن 1 : عارف أشف
زلمُكة ؟
مواطن2 : لأ .
مواطن 1: أشف زلمُكة أجدع
- سواق الميكروباص !
مواطن2 :لأ !
مواطن 1 : مش الواد أشف
زلمُكة عمل حادثة إمبارح وراح المستشفي قال إيه رفضوا يدخلوه طوارئ يا يدفع فلوس
الأول عشان يلحقوه وبعد ده كله ملقاش سرير فنام ع الأرض بمحاليله !
مواطن 2 : هاااا وبعدين
؟!
مواطن 1: أشف مات .... !!
مواطن2: وأهله عمله إيه
؟ راحوا عملوا محضر ورفعوا قضية ع
المستشفي ؟
مواطن1: هع !!! قضية إيه ومحضر إيه أجدع دول راحوا كسروا
المستشفي وقتلوا الدكتور ال كان سبب في موت أشف !
مواطن2: وشح متنح من
الصدمة .
عزيزي الفريق "
مٌنشار السلحدار" إنت عارف إنك في بلد المستشفيات الحكومية فيها زبالة وال
بيدخل فيها علي نقالة بيخرج منها جوة نعشه ؟ هاتقول في مٌستشفيات خاصة !! تعرف يا
سيادة الفريق إنها بقت تجارة بالبشر عشان يستقبلوك تدفع فلوس الأول عشان دكتور
يتحرك تدفع فلوس الأول ودي برده بتدخل فيها علي نقالة ويا تطلع جثة هامدة يا تطلع
من غير عضو من أعضاء جسمك ؟
سيادة الفريق "
مٌنشار السلحدار" مش شايف إن ده إرهاب مُستقبلي متوقع؟!
الميكروباص لبس في
مطب والكاميرا لفت إجباري ع
الشٌباك ولقطت منظر بشع ... ل 5
أطفال شوارع سنهم لا يزيد عن 10 سنين , 2 منهم بيشربوا سجاير بانجو و2 بيتخانقوا بمطاوي و 1 ماشي ورا واحدة بيتحرش
بيها !
سيادة الفريق "
مٌنشار السلحدار " بما إنك مسئول أو عايز تبقي مسئول عننا عشان إحنا نورعنيك
, كم عدد أطفال شوارع "كولاكارتون" وإزاي هاتحتوي الإجرام ال بقي فيهم
من رميتهم في الشارع ؟ اااه وهل مش شايف ده إرهاب مُستقبلي متوقع ؟!!!
الكاميرا بترجع
للميكروباص تاني و شافت 4 شباب مُتعلمين تعليم جامعي محترم وفي نقاش ساخن عن
مشكلتهم ..
الشاب 1: 5 سنين
إبتدائي و 3 إعدادي و3 ثانوي و4 كلية
,حد يقولي كده إستفاد إيه من ال إتعلمه في
حياتُه ؟
الشاب 2: ولا حاجة بجد
لإن حرام نقول علي ال عندنا ده
تعليم .
الشاب 3: أصل ضيعنا كل سنين العمر دي و أهلنا في
الثانوية العامة جلهم الضغط والسكر والقلب عشان إل إبنه يبقي دكتور ولا مُهندس وفي
الأخر يلاقي إبنه شغال في " كول سنتر أو سيلز " ما كانوا
يعملوا كلية متخصصة للمجالين دول بس وكنا هانرتاح وأهالينا ترتاح وكانوا هايوفروا !!!
الشاب 4: وسايبنا للقطاع
الخاص ياكل وينهش في لحمنا ويتحكم فينا وكأنك عبد إشتراه من سوق العبيد ! هي ليه
الحكومة سيبانا كده ؟!
يتدخل أحد الرٌكاب ال
رامين ودنهم : والحل إيه يا شباب ؟
ال 4 شباب في نفس واحد :
يا نهاجر يا نمشي شمال زي ما البلد ماشية
.
عزيزي الفريق "
مُنشار السلحدار" تعرف حاجة عن
التعليم في" كولاكارتون" ومواصفاته وترتيبنا في العالم إيه , سيبك من
مقولة " الطفل الكولاكارتوني أذكي طفل في العالم " , طب تعرف القطاع
الخاص بيعمل إيه في الثروة البشرية ال عندك ؟
في الشباب إل إنت بتحبه ؟ هو إنت
تعرف حاجة عن الشباب أصلاً يا سيادة الفريق ؟ وهل مش شايف ده إرهاب مُستقبلي
متوقع؟!
الكاميرا بتتحرك عمالة تدور في الوشوش لحد ما لقت 2 ستات والدموع نازلة من العيون ؟ يا تري إيه حكايتهم ؟!!
الست1: ماسكة صورة شاب
وتبدأ تحكي الحكاية الخاصة بيه بصوت عالي: إبني "ياسين" مات من يوم 25 لسنة 2011 ولحد دلوقتي ال قتله
متحاكمش دول بيخرجوا واحد ورا التاني , أنا ماسكة أخوه بالعافية هو ال باقي ليا في
الدُنيا دي وهو حالف لو حق أخوه مجاش لا يجيبوه بإيده .
الست 2: وأنا كمان إبني
مُعتقل بقاله أكتر من 5 شهور , دكتور ما شاء الله قد الدُنيا و كل ما نسألهم
التُهمة إيه مبنلاقيش رد ويتقالنا الأوامر
جاية من فوق وولادكم مش هايشوفوا النور غير لما يجيلنا مزاج !
ووقتها ال 4 شباب هما
كمان إفتكروا أصحابهم ال ما بين "
شهيد " إن شاء الله و"مُعتقل" بإذن الله يتفك أسره .
وقتها وبالصدفة بتشتغل
أغنية " حمزة نمرة " لسة العدل غياب , طب إيه الأسباب ؟ "
صحيح يا سيادة الفريق
" مُنشار السلحدار" هو ليه العدل غياب ؟ مش شايف إن كل ما العدل هايغيب
ال هايبقي مكانه قانون " الغابة" ؟
مش شايف إن ده إرهاب
مُستقبلي متوقع؟! .
وقتها الرٌكاب بيسألوا
الكاميرا: يا تري هاتقولي الحقيقة ولا هاتقصقصيها ؟
صح يا سيادة الفريق
"مٌنشار السلحدار" هو ليه
الكاميرا ساعات بتقصقص الحقيقة علي مزاج ال معاه خيوط اللعبة ؟!
هو ليه الكاميرا بتبقي
عايزة الناس تشوف نُص أو ربع أو 1% من الحقيقة بس والباقي تحوير ؟
وليه ال بيحب
يجيب الصورة كاملة بيكون في خبر كان ؟
هو ليه الكاميرا بتوجه الناس يعملوا إيه
ويفكروا إزاي ويختاروا إيه ؟
هو الدولة بتخاف لا المواطن يقول الحقيقة ؟! ولا
بتخاف من الحقيقة عامة ؟!
وإسمحلي بما إني نور عينك
إني أسأل سؤال " هو ليه حصل إستغلال لرجال الدين والإعلام " عشان تخلوا الناس تقول إل إنتوا عايزينه رغم
إنهم معاكم من الأساس ؟ هو فيه حاجة يتخاف
منها لا قدر الله ؟
بس سؤال يا سيادة الفريق
" مٌنشار السلحدار" هو ده مش إرهاب حالي ومُستقبلي متوقع ؟!
سيادة الفريق "
مٌنشارالسلحدار " عايز تترشح إترشح , عايز تبقي رئيس الطموح مش عيب !
بس بعد إذنك حدد لينا نوع
الإرهاب ال هاتحاربه بالضبط وبلاش تفضل تقولنا إنك لسة بتحارب إرهاب وهمي
! وعايزك تفتكر الجٌملة دي " وهي دامت لمين يا برنس" !!!
وفي الأخر الرسالة
للمواطن" الكولاكارتوني" وعلي رأي " مشروع ليلي" : قووووول إني منيييييح ! .
مصطفي أبو اليزيد.
ليست هناك تعليقات:
إرسال تعليق